Electric department khou staff raumei rui kandihmei ningmei tangh khang ranv sihna taanc bam the

1 Star2 Stars3 Stars4 Stars5 Stars (2 votes, average: 4.50 out of 5)
Loading...

TAMENGLONG, Sept 25: Tamenglong khou electric hei kage nai liangmei akhat swna bam the tiki Government rui mituang department khou taanv taanh khang staff biuna lou ngam makna bam the.

Lwm nuhmei chamv theilayna Tamenglong Electric department khou staff (manpower) raumei rui taanv taanc bammei nunc khang kungh hak bam the.

Staff geihmei hei gaanthau rana dithe, kumna kaniw guay thingngouh ding khou line check sw tat dat khang kungc the. Taanv geihmei hei contract khou lagut loumei nunc rui zauc bam tuang the twna saa kan e.

Ntaw hei Tamenglong khatni Tousem khang hei staff 19 nai e, milungc khou tei Tousem khang swna thu staff akhatna de twna saa e. Kumna staff charuk dou thu 2020 tangv ethei retire tat kan nimei nai the.

State Government khou staff kage naimei tei thu tii ku lou kan the tiki recruitment tei tatkey makna bam dihe twna chamv tei rui saa kan e. Chaeng-pumh simei khatni electric tiangc geihmei jungle lungc thangc lingc loumei rui ntwn ganv khou thu linemen nunc kabiu nuhmei azuh ariuna guang bam tuang the.

Public guay rui electric guang makmei ta nac pressure tii bam e tiki department lungc khou kage naimei tei thu pressure tii nkhav lou nimei thu maekna bam e twna department tuang concerned member rui The Gaanphiu Mail chamv laamei khou saa kan e.

Tamenglong khou kwm 2016 khou tei rui Prepaid guangmei tangv electric loadshedding thu nai dat rap kan mak khe tiki geihmei postpaid piu bam rui zaucsin kunghmei nai bam dihe twna saa kan e. Postpaid piumei nunc rui electric hei meicguayna khang kakhan makna electric rice cooker, heater, filament bulb piu bam e.

Kumna kaikhunh geihmei rui electric hei 24 hours daanclouna bammei nic nai the. Mbuna Postpaid piumei nunc hei bill tii khang ning makna piu bam geic dihe, Government office azuh nic bill paa khang thou sw makmei nai geic the twna saa kan e. Kumna kaikhunh azuh rui electric hei piu houc bammei nic nai geic dihe twna saa kan e.

Electric Department theilayna Covid-19 tuang issue hei luai kan ethei prepaid line connect sw kahouh dat khang karamc pwni the twna saa kan e.

 

Milungc khou Substation Nrailuang khou taanc bammei hei luai ethei Tamenglong khou Electric tuang problem hei rau key bam nuh the. Tiki Sub-station taanv hei nic progress hei how pat rap makna bam e.