Tamenglong – Haflong chaeng nai reymei alignment khou taanh khang TVSF rui Add’l Chief Secretary khou Memo tii kan the

Gaanphiu News Networks

Tamenglong, Nov 12: Tamenglong Village (Inriangluang) Students’ Federation (TVSF) rui Tamenglong – Haflong highway hei nai bam reymei alignment khou taanclou khang Additional Chief Secretary Paulunthang Vaiphei, IAS (works/Transport/ADBI) khang memorandum 11th November nungc tei tii ku kan the.

Mi tuang memorandum tei NHIDCL tuang General Manager, ADB tuang Director, khatni Deputy Commissioner, Tamenglong khang nic copy swlou kan e. Memorandum khou rey khou nunahlou reymei alignment, Gupta Alignment theilayna Old Tamenglong khou zero Point sw khang saa kan e, kumna rey khou rui mi chaeng taanh khou Compensation laa lakge twmei NOC ni Tamenglong lev namv baihmei rui tii kan tuang the twna saa e.

Gupta Alignment khou Tamenglong-Halflong kasiamh ethei namv 22 mbu kang lanvguanhmei chaeng ni tiigaylou puni e, mi teina ramh makna ntaw chaeng pumh simei rui kasiamh chuylou ngam mak bammei Zeilad lev Ahu Khouduang daeng ni tat guang lou puni e twna saa kan e.

Khatni NOC tii mak ethei mi TamenglongHalflong chaeng kailuang tii tat ruan lakge twna DC rui saamei zaeng Gupta Alignment khou taanclou pwang e twna lwmgayna namv nunc tei rui NOC tii kan tuang e tiki mi tei ramh makna District Administration rui namna Alignment kathanh khou tat khang sw bam e twna ni Memo rui saa kan e.

Gupta Alignment sinsw mak khang saana National Highway kasiamh nimei hei National Highway akhat khou rui kahouhna National Highway akhat khou nganvlou nina de twna saamei tei mi kumhmei Rule maekge twna saana mi latbamv hei Agency rui saa nthanlou khang saa kan e.

Ntaw DA rui Tamenglong-Halflong Highway tiiswlou ni bammei Alignment kathanh hei Highway kasiamh khang nuh makge twna Border Road Task Force (BRTF) rui 1990s khou nuh maklou kan tuang the.

Kumna 1990s khou tei alignment kanei kasiamh khou laupuk, thingsaythingbwan azuh sw kasihna taanv mpeyna gutlou kan tuang e, kum sihni alignment kathanh tat dat kho tw ethei ramvdui mpeyna maan puni the heizaeng rui rey khou tuang alignment, Gupta Alignment hei tat nina de twna Memorandum tei rui saa kan e.

Alignment kathanh hei tat rap puni de tw ethei rey khou alignment 2 chau rey kan khou tuang Compensation tei rii rey nina de twna saa kan e. Memo theilayna British ganv khou rui Old Tamenglong hei chapriak lwan khou khatni Administration lwan khou kachung sw bam tuang e, kumna Administration khang ramvdui tiipatlou bam tuang e.

Tamenglong-Highway chaeng hei ni mansei nunc rui rigwn bammei chaeng e. Kum bam khou Alignment kathanh khou kiu tat kani de tw ethei mi alignment kathanh hei rui Tamenglong tuang ramv katitna sihni kahi tow nuh makge twna saa kan e.

Khatni Government Project ta thingh makge tiki Development tuang taanv khou Politic sinsw nuh makge twna saana Alignment kathanh hei Rongmei namv khatna sihni kahi towlou makge twna ni saa kan e.

Alignment kathanh ta namv azuh rui kahaw makge, Development tuang taanv hei mansei nunc kahaw makmei khou tatkey nuh makge twna TVSF tuang memorandum khou tei hy kan e kumna mi latbamv ta thouh swlou mak ethei mansei kangdai rui agitation tatkey puni the, mi khou hei kahaw makmei thiak pat sihni phwam rui karith laa ni tuang ramh makge twna saa kan e.

You may also like...