JAC Khoupum Area tuang Bandh khuangh 48 lou haplou kan the
Gaanphiu News Network
Khoupum, Nov 12: Tongjei Maril Road (NH-37A) kasiamh chuylou makge twna Joint Action Committee Khoupum Area rui saa bammei ta Manipur Government rui thouh swlou makge twna Bandh khuangh 48 lou haplou kan the.
Mi chaeng hei kasiamh chuylou o twna JAC Khoupum Area rui bandh tatkey kan tuang e. Kumna ntaw Tongjei Maril Road (NH-37A) khou bandh tatkey bammei lam khou JAC Khoupum Area rui meeting tatkey kan e, mi khou bandh tatkey hap dat khang dinglou kan tuang e.
Bandh tei 12th November nungc khuangh 5:00 PM khou rui 14th November nungc tingzyn khuangh 5:00 PM nganv tatkey khang dinglou kan e. JAC Khoupum rui tiipatmei Statement theilayna mi tuang Bandh khou hei Medical, Military, Water Supply, Electricity, Media, Fire Service khatni Telecom Duty ta thu thingh makge twna saa e.
Kumna mi tuang bandh hei laganclou dat khang PWD Manipur rui 11th November nungc JAC Khoupum Area khang che tii ku kan e. Mi che khou tei Public Work Department, Manipur rui ni 7th November nungc CM khang tiiku kanmei Memorandum theilayna mi tuang bandh tei laganclou khang saa kan e.
Mi khou tei saa bammei chaeng dak ta kiuc zaucsinlou khang PWD rui nthukna laa bam e, kumna mi chaeng ta zaucsinlou khang M/S Keystone Infra Project Ltd ta 8th November nungc tei saa kan tuang the twna PWD tei rui saa kan e. Kumna saa bammei chaeng hei December lungc khou kasiamh luailou khang M/S Keystone Infra Project Ltd rui nuhlou kan tuang e twna saa kan e.
