Vaccine hina side effects bam kamme khatdi 100% efficacy haye

Vaccine hina side effects bam kamme khatdi 100% efficacy haye
By: Angambou Kalengtamai

Raithu boga din masan khaibo;

Eh medical doctor makge, chiudi Eh niu ariak ga, newspaper, media ga si kalubo, Vaccine lamga kasia raopad khai ye. Kadiriga tuhoi aliu niu vaccine kubambo hina pagu side effects kahabo vaccine haye khat di vaccine siniu charapuat khat tu 100% protect thiu ngambo vaccine pad makha ye. Vaccines hina merit khatdi demerit bam kamme. Sikum jiu tuhoi Covid-19 vaccine padbam bodi 100% efficacy/protection haye. Pagu side effects di katam tambo vaccines kum jiu bamme. Raibo ga Covid vaccine lam ga phuirai matai khe.

India ga tuhoi Covishield nai Covaxin haisi Corona gu Vaccine para thiu jiu pibam me. Sputnik V haisi di Pawan thengmak jiu pimi sune. Covvishield haisi England ga Oxford University nai AstraZeneca niu researched kamlu taliu padbo Covid-19 vaccine ye. India ga haibo vaccine hai Serum Institute, Pune, Maharastra, niu taliu chali padlan bamme. SII (Serum Institute of India) haisi kadi piriga vaccine taliu pad makeng thubo company/Firm/Institute ye. Haibo Institute gasu India gu vaccines katam tambo, Hepatitis-B, Diphtheria, Tetanus, Measles, Mumps, Rubella, Polio, BCG , etc. haikumbo vaiccines di taliu pad jiu India ga khatdi kadi piri Pakhiang nadi export kam jiu bamme. Covishield hai dose nia kep nei. Karaibo dose keplu bosai 12 weeks (Chahiu sum ) saiga paniabo dose keplan ne.

Covishield vaccine haisi research nai Clinical trials kambo ga, Covid-19 maramai, karaibo dose keplu bosai naimikpui 22 sai, 76.0% prevention/protection (Efficacy) piye chiu dinne, paniabo dose chahiu sum sai keplan lubo sai haibo percentage si 81.3% nkiu khang ye chiu jiu clinical trials niu dinne. (Lancet, Feb. 2021). Chiudi haibo Vaccine haisi di pagu side effects bamme, sidung sira: Vomiting (Maruibo), diarrhea (Chawan sabo), swelling (Minbo), chapiu kepbo bamga heng padbo (Redness), enlarged lymph nodes, decreased appetite (Katiu tiuni makbo), dizziness (Taning majitbo) sleepiness(Ngui niubo) sweating (kasuangdui padbo), abdominal pain (Chawan thiubo), itching (Masakbo) khatdi apum ga papom poina heng ru ru padbo. Haisi chamai 100 ga khangkhat khuga paddle chiu jiu dinne. In very rare cases (around 1 in 100,000 people) the vaccine can lead to blood clots (Tajai luangbo ga khambo) in combination with low levels of blood platelets.

Covaxin haisi Bharat Biotech, Hydrabad nai Indian Council of Medical Research (ICMR) niu taliu padbo vaccine ye. Haibo covid-19 vaccine haisi di pagu efficacy rate si 81%, ye chiu jiu Third phase clinical trials gu result niu dinne. Chiudi haibo covid vaccine haisi di side effects bamme. Sibo dung sira: Chapi kepbo bamga thiubo (injection site pain), Apum malaitabo (Fatigue), Agi-kasuangbo (Fever) Chapi doubo (Headache), Chapum jan thiubo (Body ache), Maui-niubo (Nausea), Chawan thiubo (Abdominal pain), Chama majibo (Dizziness), Kasuangdui luangbo (Sweating), Agibo (Cold) khat Makhiubo (Cough) haidung si vaccine keplu bosai paddle.

Sikum jiu tuhoi Russia gasu taliu padbo, Sputnik V chiujiu kubo Covid vaccine haisi di India ga kephou maji mi sune. Haibo Covid vaccine gu efficacy haisi 92% protection piye chiu jiu world medical Journal “Lancet” ga published thiupad ye. Chiudi haibo corona vaccine di pagu side effects ra bamme, Si sera: (Makhiura padbo kum marabou (flu-like illness), Chapi doubo (headache), Mara niuriak bo (fatigue) khatdi Chapiu kepbo jamga thiubo heng padbo, mien padbo (injection-site reactions) haikumbo si padle.

Pariga raokhai bamboo Covid vaccines dung kum jiu, kaki kibo vaccines hina di 100% protection pibo vaccines haye khatdi pagu side effects di bam kamme. Example khat nia phui matai khe. Hepatitis-B vaccine hasi ngena (Child) mana lugap sai first dose pimi mi ye, khat di chahiu 6 gasu 18 lung ga dose hina keploi mira ye. Haibo vaccine gu efficacy haisi 85–90% ye chiu jiu dinne.Haibo vaccine di maihina tu 100% protection pimakge. Khatdi vaccine kakibo kum jiu haibo vaccine gudi side effects keng bamme, sidung sira: Chapiu kepbo jamga hengbo, masakbo khatdi mienpadbo, Chapidoubo, Taning majitbo, Takhuk thiubo, Taniu thangbo maksai tadui luangbo, agi-kasuangbo (temperature 100ºF maksai sisuang nkiukhangbo), Maruiniubo, Chakhen/changum thiubo, Chamik ngou masan makbo (blurred vision), Agibo, Tamutsabo (constipation), Tasiu thisabo (difficulty in breathing), Katiu tiunimakbo, Tanenriang jubo (Seizure) Chawan thiubo, Taniu, Taju khatdi Chamik ga mienbo khatdi chapumriet tamkiubo (weight loss).

Diphtheria, Tetanus and Pertussis (DPT) Vaccines haisi di nahmai (Children) khatdi katingmai di kep jiu bamme. Haibo vaccines gu efficacy nai side effects di phui matai khe.

  1. DTaP fully protects:
    I. 98% of children within the year following the last dose.
    II. About 71% of children 5 years after getting the last dose of DTaP
  2. TDaT fully protects:
    I. About 73% of adolescents in the first year after vaccination
    II. About 34% of people 4 years after vaccination
  3. TDaP during pregnancy, the vaccine prevents:
    I. About 78% of pertussis cases in infants younger than 2 months old
    II. About 90% of hospitalizations for infants younger than 2 months old with pertussis.

Haiga pariga pibo data tu phuisai, haibo vaccines di 100% protection pi makge, sironna mak jiu haibo vaccines hina di side effects kakibo vaccines kum jiu bamme. Sidung sira, Chapiu kepbo jamga thiubo, men padbo, Agi kasungbo, apum malaita bo (Feeling tired), Katiu tiuni makbo (Loss of appetite) Chawan thiubo, Chapi daobo, Marui-Tamuatbo khatdi fever kambo, etc.

Haichiu jiu vaccines hina (Including Covid Vaccines) pagu side effects bam kamme khat di ncham di ncham kamme. Kakibo vaccines hina ra aliu mathiu nda kit jiu bamme. Vaccines kep maksai school maksai college ga admission pimak bodi bamboo aliu sijiu bamme. Tamil Nadu, Kerala, Uttarakhand maksai Arunachal gu government schools kumbo ga aliu nahmai dung tu vaccination kam maksai school ga admission pilakge chiu jiu din bamme. Haisi covid vaccination tu eh dinbam bo makge.

Vaccines like: Diphtheria and Tetanus toxoid-containing vaccine and Pertussis vaccine (DTaP or Tdap), Hepatitis B vaccine, Measles, Mumps and Rubella vaccine (MMR), Polio vaccine, Varicella (Chickenpox) vaccine, haikumbo vaccines dungtu dinbam bowe. Aliu nahmai dung tu IIT maksai MBBS kumbo pi katine sai, nahmai tu pariga raokhai bambo vaccination dung si kam maksai, Medical College, IIT gu institutes ga admission kamdou lakge. Kadi pabam tam tambo ruantad radi vaccination kam maksai, passport hai suimakbo bamme. Haisi aliu mathiu sibam sui, simak bam suiye. Siniu, charapuat katam tambo tu kadi riga khamlu raleng jeng niu, vaccination hai kadi ri pakhiang naga kam jiu bamboo ye.

Sikum gap jiu tuhoi di Covid-19 vaccination haisi kadiri pabam hina ga tadkiu jiu bamme. Vaccine kampadbo wan machang chamai pabao kasia niu suini makbo bam jut jut le. Nda gasu vaccine tu suini makbo pabao bamdi, aliu tanah mai mathiu tu tuhoi aliu BCG, DPT, Hepatitis-B, Polio virus vaccine si aliu kepkam jiu bamme. Parilam din mibo kum jiu, DPT, BCG, Hepatitis-B, Polio etc gu vaccines hina tudi kadi riga pabao khat suini makmai bamme khatdi sibo vaccines hina di pagu side effects bamkam ye. Sironna makjiu, haibo vaccines dung haidi 100% protection pibo vaccines khatdi haye. Sichiu jiu aliu tuhoi katang vaccines kepwang misai, tuhoi dekam jiu Covid-19 vaccines tu aliu kep ping jiu bam jiu lo? Haisi di nda Flu vaccine, Polio Virus vaccine, Hepatitis –B vaccine kumgap boye. Nda haikumbo vaccines kampad jiu bambocompanies/Firms/Institutes dung niu tuhoi di Covid-19 vaccines hai taliu jiu bamme. Wahdi katam haye.

Tuhoi Covid-19 vaccines kepbo haisi pachun pachun ne, kep nimai kep, kepni mak mai kepmak di sui ye. Chiudi pasai lungkhang lanra bowan ga, BCG, DPT, Hepatitis-B Vaccines, etc kep maksai nahmai tu School ga admission pilakge, MBBS, IIT ga admission pilakge chiubo kum jiu, Covid-19 vaccine kepmak mai tudi, admission pilakge chiu bowan wang sai, aliu nahmai dung tu pi doctor, Engineer, IITians pi thiukhai makra mah? Tuhoi America ga Immigration Visa maksai America ga permanent Resident Status lune sai haibo rapuat dung si vaccine kep maksai sui makge. Si sera: Mumps, Measles, Rubella, Polio,Tetanus and Diphtheria Toxoids, Pertussis, Haemophilus influenzae type B khatdi Hepatitis B.

Vaccine haisi ra Virus, etc saimibo (kiiled) or karingbo (Alive) chamainah tu kam mara mak rabo quantity ga chamai pumga kepkhai bowe. Sibo Virus, etc. aliu chamainah pumga ngutbo wanga aliu gu Immune System niu sise tu kam maha ra matanne. Sibo matanbo gasu, wuibo ndanlam su ngutbo virus (Killed/alive) tu chari aphenra chapum ga kabambo agu Immune System niu antibodies hai pi nkiu khang khaiye. Sichiu jiu apum hai pasai wuibo rapuat ngutlan bamdi, agu immune system niu sibo rapuat tu aphen ngamra antibodies bam mibo jeng niu, vaccine keplu bosai, charapuat si chamaina pum ga ngutlan ngamta mimi ye. Sileng jeng gasu, aliu vaccination ha kam kam bowe. Covid-19 vaccine hai kalangbo lung-ga kampad mak doulak jiu, kadi riga scientists mai hai jiu aruang lujiu taliu pad biye. Kam kalang jiu kambo jeng niu, chakhouna (Animals) khuga kaki kibo vaccine kum jiu Trials kam mak jiu, chamainah pum gasu directly trials kam jiu taliu padle. Sijeng niu Trials wan ga kasia side effects di padbo aliu side. Chiudi tuhoi ra phase sum trials kamloi lujiu thenbo sui mide chiu jiu kadi piri pakhiang naga kep jiu bamme.

Dinsan khai jiu, Covid vaccine haisi tanakhamra kampadbo vaccine makge, Satan leng gengra kampadbo makge, Chamai tu kam satra kampadbo makge. Covid vaccine haisi kadi riga coronavirus tu kam maha lujiu, chamainah lung aman jiu, karingting theng jiu, chapum wijiu lungra taliu padbo ye. Covid vaccine haisi Hepatitis-B, BCG, DPT, Polio vaccines kumbo ye. Wadi nping manang ra haye. Nda vaccine katam tambo kep kinmai hina Covid-19 vaccine di kepbo suiye.

Mathiu pumwi-jengwi jiu lungbo thiulo.

You may also like...