Samuel Jendai lam asei court kudat puni

DihCham News Service

TAMENGLONG, 23 AUGUST: Tamenglong AC tuang MLA phungloumei Samuel Jendai ruina Manipur Legislative Assembly tuang member akhat suna kabam mpat keilou kanmei luan khou Manipur High Court khou case phungkulou bammei latbam tei nthuan 24 August nung tatkei dat khang causelist khou lou bam the.

Samuel Jendai tuang latbam hei serial number 25 khou lou bam e tuna sa e. Mi latbam hei Manipur High Court tuang judge kaneihLanusungkum Jamir khatni Ahanthem Bimol Singh tuang double bench khou tatkei puni.

Samuel Jendai ruina court khou phungkulou bammei latbam hei, kamei ruina MLA tuang bam mpatkei ni the tuna tiku kanmei che tei kapum kahak le Speaker ariuna tilou kan mak ge khatni Speaker ruina ni mi che lam khou tei phu gutloumei akhatna sini su mak nga akumma resignation tender ta accept su bam tuang cho tumei latbam e tuna sa e.

Milam khou hei hearing tatkeiliang kathum kan tuang the. Ningtoulou nu e, Samuel Jendai hei aseiluan tuang 10th Manipur LegislativeAssembly election 2017 kum tatkei kanmei khou tei BJP ticket khou rui 53- Tamenglong (ST) AC khou rui ku kan tuang e.

Kumma, June 17, 2020 nung rui BJP tuang Primary member khatni MLA bam hei mpat kei the tuna khatni Congress ta machuang the tuna kaohpat kan tuang e.

Minung tei NPP tuang minister padei, BJP tuang MLA kathum khatni AITC le Independent MLA akhat khat ni resign su kan tuang e.

Tiki, NPP minister padei le AITC tuang MLA tei thu government khou ntao gutbam dat the. Mbuna, Samuel Jendai hei 6 August nung tei Congress tuang Primary Membership khou rui ni nthek the tuna MPCC tuang President khou resignation tender sulou datna bam bam tuang e.

Samuel Jendai hei thaorei khou 53- AC tuang seat hei nphangliang kathumlouna TD and Hills Minister ni phunglou kan tuang the. Kamei rui MSCP, FPM khatni NPF khou ni kajaolou kan tuang e.