Manipur khou COVID-19 rui 2 theic, case kathanh 92 mphang kan e

1 Star2 Stars3 Stars4 Stars5 Stars (No Ratings Yet)
Loading...

State Health Department tuang chamv theilayna Manipur khou COVID-19 rui 2 theic dat kan dihe, mi nunc tateic pacna State khou COVID-19 naimei 380 tangc bam the twna sa e.

Aseih theic kanmei tei ntumei rana e, Kakching lev Jiribam khou mei e kumna kaney tei katingkwm 80 lev 63 mei e twna sa e.

Chamv theilayna aseih tat kanmei khuangh 24 lungc khou tei COVID19 naimei 92 mphang kan e, mi nunc tateic pacna State khou COVID-19 naimei 29,961 tangc bam the. Mi dak khou tei COVID-19 khou rui gay dat bammei 22 ta ni discharge swlou kan e, mi nunc tateic pacna State khou COVID-19 khou rui gay dat bammei 29,128 tangc the twna sa e.

Ntaw State khou COVID-19 naina ravzauh bammei 453 nai e kumna COVID-19 khou rui gay dat bammei rate hei 97.21% e twna sa e.

COVID-19 naimei kathanh mphang kanmei pangc khou tei Imphal West khou rui 46, Imphal East khou rui 13, Thoubal District khou rui 9, Bishnupur khou rui 5, Churachandpur khou rui 5, Chandel khou rui 5, Jiribam khou rui 5, Senapati khou rui 5 khatni Kangpokpi khou rui 5 mphang kan e.

Kumna State khou swna 1,13,651 khou COVID-19 pu kaeplou tangc kan the twna chamv rui sa e.

 

 

 

Manipur University Semester 1 lev 3 tuang

Exam kaganv zay kasuanhlou kan the

Manipur University rui laengvmei 1st Semester lev 3rd Semester (November) tuang exam kaganv zay kasuanh pat kan the. Mi tei State khou COVID-19 naimei geic khith-khit ku bam timei zaeng rui zay kasuanhlou kan tuang e.

Manipur University rui tiipatmei Notice theilayna Exam zay kasuanhlou kanmei nunc tei Bachelor of Arts, Bachelor of Sciences, Bachelor of Commerce, BFT, BSW lev BTT e twna sa e. Kumna Exam tatkey dat nimei tabui ganv khou tatkey dat puni cho twmei thay makge tiki exam tha dat nimei zaeng 7 dou mav khou tiithay pat dat puni e twna Notice tei rui sa e.

 

Ima Keithel lev kadaeng khou naimei kaithyan nunc

ta zaeng 10 mbangh khang kaucpat kan the

Imphal khou asaanh mak khou na rui laanclou dat kanmei Ima Keithel kathumh tei mbanghlou dat kan dihe. State Government rui tiipatmei Order theilayna mi kaithyan nunc khatni kadaeng khou naimei kaithyan nunc zaeng 10 mbangh puni the twna sa e. Mi tei State khou COVID-19 naimei katumc hakna geic ku bam timei zaeng rui mbanghlou kan tuang e.

Ningtowlou nuh e, theikwm State khou COVID-19 guang rap khou tei rui kahouhna Ima Keithel kathumh lev kadaeng khou nai bammei kathyan nunc bw 11 dou mbanghlou kan tuang e, mi tangv 16th February 2021 nungcna tei rui laanclou dat kan tuang e.

Kumna aseihluan mi kaithyan nunc mbangh khang kaucpat dat kanmei tei State khou Night Curfew lou, mansei kaduaimei mung nunc thingc kumna Paona Bazaar lev Thangal Bazaar khou dukan laanc liang-liang khang kaucpat kanmei tangv mbanghlou kan tuang e.