Mai ntimma gaannei kabiu kan the; ‘mai riang, duiriang jao chuilou o’

1 Star2 Stars3 Stars4 Stars5 Stars (No Ratings Yet)
Loading...

Tamenglong-Imphal kak khou tat bammei Suaihiamgan passenger bus tuang handyman le baimei akhatta mai ntimma kabiu kan the.

Mi thiak tei dulanung Imphal thang rui guang nga ‘Welcome to Tamenglong Gate’ khou ding keina puat lakei khang bus nam ru kumei gan khou na na nai bammei mairiang rui bus handyman Dichunlung Gonmei ta ntim tina bus nam khou rui kandih ndat kei kan e khatni bus lung khou dung bammei passenger akhat pu ta mai tei rui ntim tina kandih ndat kei muai kan e. Kading khou gaanneimei tei theih keina Tamenglong pusang khou rajao kan e.

Rajaomei tang theih numei khou rui thu duak kan the tiki Imphal thang specialist khou rajao mak ethei nu makmei lam nai geimei jeng rui RIMS thang rajao kei dat khang ndiulou kan the.

Mi bam khou tei mai ntim kanmei aseiluan rui kanei tangmei the. Rei khou ni bus nam khou dung bammei passenger gaanthum ta ntim tang kan tuang the.

Tiki mai ta jaosin bammei MSPDCL rui thou sulou mak khou rui e tuna Driver Association Tamenglong District rui pian makmei ndao kan the. Tamenglong Town lung khou hei gari tatmei cheng kan khou hei mairiang, duiriang khatni telephone riang anamei aju nai the.

Mi guai hei katummei lung khou kaji naimei department khatni charai guai rui kasiam chuilou tho. Katang thang kabiu kabengmei patdat tuang nai ethei kaji naimei department guai khatni puat kaipou charai guai tei rui karit phung nina the tuna Driver Association Tamenglong tuang President Gaikaopou Gonmei rui sapat kan the.