Framework Agreement khou katipna ding bam puni: NSCN-IM

NNN, Dimapur, Mar 16: Naga Solution hei mphang khang Framework Agreement khou ding tip bam puni e twna NSCNIM rui saa kan e. NSCNIM tuang Statement theilayna Prime Minister PV Narasimha Rao ganv khou tei Indo Naga Political Talk hei kadwan gay hakna kahouhlouna 1997 khou Cease Fire lou kan tuang e.

Kumna 2002 kwm Naga tuang History ta thaylou kan e, kumna mi lwan khou 2015 kwm Framework Agreement sign sw dat kan e. History khatni Political Right theilayna Naga khang ningthav tiilou biuc rapmei e twna ni saa kan e. Tiki Naga ta nuh makmei nunc rui Framework Agreement theilayna latluai key mak khang taanv sw bam e twna ni Statement tei rui saa kan e.

Zauc keymei ganv khou 9 Point Agreement, 16 Point Agreement khatni Shillong Accord kumhmei nunc hei Naga Solution phungc guang nimei tuang ramh makge tiki Nagamei kasaek Naga tuang right zuanc tuna India khou rui gaengmei kasaek laa ni bammei nunc khang gaeng khang na de twna saa kan e. Naga Congress Leader nunc kasaek rui Framework Agreement ta ni nuhni mak bammei nai twna saa kan e.

NPCC rui kadyng khou na gaengmei mphang khang, khatni Nagaland State khang na Solution mphang khang karamc bam e, mi hei Israelmei rui Canaan tat khang tat bammei ganv khou Egypt tat han dat khang Moses khou saa bammei Israelmei nunc kumh tuang e twna NSCN-IM tuang statement tei rui saa kan e.

Kumna Egypt han dat mak khang twmei NSCN tuang lungdyng e twna ni saa kan e. Naga hei mansei thaylou dat makmei, maanv kanmei zaat tiiswlou khang ngam makge kumna heisaan tat guangmei chaengkaemv hei tabui-bui bam sihni han dat ni tuang ram h makge twna Statement tei rui saa kan e.

 

Naga lev India kak khou Talk tatkey

bammei ta ANSAM rui machuanglou kan e

Senapati, Mar 16: NSCN/GPRN lev India Government kak khou tatkey bammei talk ta All Naga Students’ Association, Manipur (ANSAM) rui machuanglouna ntaw tatkey bammei Talk taheic CSO nunc rui machuanglou bam khang karianh kan e.

ANSAM theilayna Naga Flag, Naga Constitution khatni Nagamei rui akhatna swna lunghmei hei Nagamei khou rui khat sihni pat-pat nuh makmei the twna saa kan e. March 8, 2021 nungc Sheley Chara Memorial Hall, ANSAM Secretariat Complex, khou ANSAM tuang Presidential Council Meeting tatkey kan khou tei ntaw tatkey bammei Indo Naga Political Issue tuang lam kaphianhlou kan e twna ANSAM tuang Statement rui saa e.

Kaganv tingsaengc sihna baanh thau akhyam guangmei tangv Naga Issue hei Political Issue e twna India rui thayloumei tangv Naga lev India kak khou latluai key khang ceasefire lou kan tuang e. Kapy kagav swmei guay rui baanh thaumei ta ramhna ceasefire ta riulou bam khang kage nai e twna ndauhlou kan e.

Mi khou tei Naga lev India kak khou lou bammei Ceasefire Manipur ta kazauh makge twna Manipur CM, N. Biren Singh rui saapat kanmei latbamv tateic ni nuhni makmei ndauhlou kan e. ANSAM theilayna Central Government rui Prime Minister tuang thaek khou latdyng laaloumei ta Manipur rui chakhwang swlou mak bammei hei angakge, mi hei Indo-Naga Political Issue luailou khang taanv tatkey bammei ta thouh swlou mak tuang de twna saa kan e.

Ntaw tatkey bammei Talk hei June, 1995 nungc Paris khou Prime Minister PV. Narasimha Rao lev NSCN leaders kazauhna tatkey rey kan tuang e. Mi tangv February, 1997 nungc Zurich khou Prime Minister H.D. Deve Gowda lev tatkey dat kan e.

Ntaw Naga Issue hei luailou khang NSCN tuang Collective Leadership lev GoI rui Talk tatkey (contd. from page 1) bammei taheic tancna machuangmei ndauhlouna phwam kanei rui sign swlou kanmei Framework Agreement theilayna taanv tatkey nina e twna ndauhlou kan e.

Kumna mi tuang Issue hei lat khou ni taanv khou ni Naga tuang History thei suicna luai key nina the twna saa kan e.

 

Nungba khou rui covid-19 naimei 3 mphang kan the

Noney, March 16: Noney District tuang Nungba Sub Division khou naimei St John High School khou COVID-19 naimei 3 mphang kan the.

Mi tei aseih RAT swmei ganv khou rui mphang kan tuang e. Chamv theilayna mi nchamnac 3 tei St John Parish Hostel, Nungba khou bammei rana e kumna mi hostel khou nchamnac 60 dou bam tuang e twna saa e.

Mbuna, aseih COVID-19 mphang kanmei 3 ramh makmei baihmei nunc khou ni COVID-19 nai bam nuhmei lwn how pat bam e twna ni saa e. Kumna mi ravpyan hei naengv liklou mak khang khatni kadai swna nchamnac nunc ta kanlou nuh khang Joint Tribe Student Association (JTSA) tuang President, Masanbou Thuimai, rui District Surveillance Officer, Noney District khou saaku kan the.

Khatni mi School lev Hostel bamv taheic Containment Zone kaucpatlou khang JTSA tei rui saa ku kan e.

You may also like...