Tamenglong lev Jiribam ramsiat lam lat geic bam the

1 Star2 Stars3 Stars4 Stars5 Stars (No Ratings Yet)
Loading...

Gaanphiu News Network

Tamenglong, Jan 6: Tamenglong District lev Jiribam District tuang ramvrei lwan khou Tousem Sub-Division khou naimei Khedagar Khasia namv tuang Chairman ta baanh keyloumei lam zaucgutlou khang DC Tamenglong khou saaku kan the.

Mi namv tuang Chairman, Aming Shyla, tuang che theilayna Jiribam District khou bammei Ntaimei khatni Bengali saamei nunc rui Tamenglong District ramv lung khou namna gut lungc bam the kumna mi lam hei zaucsinlou khang District Administration rui zaucsinlou khang kaluan geic sih saaku kan tuang the tiki taanclou mak bam e.

Kumna 6th January 2021 nungc ni Jiribam Development Organisation tuang President, Sadananda Singh, rui zayna Meira Paibi lev Volunteer nunc rui baansyn kazauh guangna Khedagar Khasia tuang Chairman ta laupuk thangc nym tatna kadwnglou kan e.

Khedagar tuang ramv khatna sihni zuanclou makge tiki thow khang zuanclou tu cho twna kadwngna thanv kan e. Mi tangv Jiribam tuang SDC rui guangna Chairman ta blank paper khou sign sw khang saa kan e tiki sign sw kan makge twna saa e.

Tabui zaeng rui mi tei sign sw khang cho twmei ni SDC tei rui saalou kan makge twna saa kan e. Kum bam sihni District Administration rui kazi naimei taanv taancloumei ta lwmgayna kaniw ruh khou baanh key khangclou makge twna saana mi lam khou District Administration rui mincna zaucgut louna Security tiilou khang zaenghuay kan e.

District Administration rui zaihmei lungc khou Jiribam lev Tamenglong tuang ramsiat lam zaucgutlou khang nic chairman tei rui zaenghuay kan e.