Neiphiu Rio le TR Zeliang rui Naga issue khou nchamma sapat kan the

1 Star2 Stars3 Stars4 Stars5 Stars (No Ratings Yet)
Loading...

DihCham News Service

TAMENGLONG, DECEMBER 18: Nagaland tuang Chief Minister Neiphiu Rio khatni Opposition leader TR Zeliang ruina chamlamei nunta nchamma ariulou kanmei tang asei hei nchamma press release akhat ni tipat ncham dat kan the.

Ruling le Opposition ruina asei hei nchamma taansu bammei hei Nagamei guai chun ncham kan diu khang khatni nchu- njengmei mi ramkaan khou hei nai kan diu khang rui e tuna sa kan the.

India tuang Prime Minister Narendra Modi khatni Union Home Minister Amit Shah ruina Indo- Naga latbam hei katummei lung khou luailou khang tatgut bammei tihei thuankumei ndao kan the.

Kumma, ruling party ruina CM Secretariat khou 15 October 2020 nung tei consultative meeting tatkeilou kanmei khatni Opposition NPF tuang Political Affairs Mission ruina 14 September 2020 nung Chumukedima khou consultative meeting lenglou kanmei kaneih hei ruina Nagamei guai hei mi political issue khou hei lunggut bam e tumei lianlou kan the.

Mbuna, Neipiu Rio khatni TR Zeliang ruina tipat kanmei che tei rui NSCN(IM) khatni NNPG ruina khatle khatta kuaklou kari lana khatni lum kari dat lana guang kariuna khuan akhatna suna Nagamei jaat khang gaimei phung guangloumei sulou tho tuna ni appeal su kan the.

 

Doctor akhatta showcause notice ti kan the

DihCham News Service TAMENGLONG, DEC. 17: Tamenglong District Hospital khou hei doctor khatni specialist raona taansu nu mak khe tuna kathan tiguang haplou khang ntaan bammei lung khou hei mi pusang khou posting tilou kanmei doctor akhat ruina kataanbam guang jat mak bammei jeng rui 21 December 2020 nung kiu 1 PM lung khou guang nga taansu kahou nina the tuna DC Tamenglong Armstrong Pame rui asei hei latdan akhat tipat kan the.

Kataan bam guang jat mak bammei doctor kiu Dr. Thounaojam Chandrakumar tuna kao e. Kata tihei thaorei khou ni kataan bam khou guang tho tuna CMO Tamenglong ruina ni kao bam tuang the tuna sa e. Kamei rui 21 Dec nung kiu guang mak ethei thu Disaster Management Act, 2005 bang khou cation la puni the tuna DC tuang latdan tei ruina ni tithai pat kan the.