Tamenglong Centenary Mall September khou taanh kahouna buh 8 khou taanluai dat puni

1 Star2 Stars3 Stars4 Stars5 Stars (No Ratings Yet)
Loading...

DihCham News Service

Tamenglong, July 30: Tamenglong sub-division nai guangmei tingkum 100 tangmei ta ningtou bam khang kasiam thao nimei kaithian- Tamenglong Centenary Mall hei aseikum September khou taanh kahou puni the tuna committee rui sa e.

Mall hei taan kahou khang August 15 nung kiu launch su puni the, kumma bu tachat lung khou taanhluai khang karam puni e tuna ni sa e.

Tamenglong kaidai tuang Chingkhiuluang khou naimei bam khou hei ground floor khou gari parking su puni e, first le second floor khou ruina mall suna puat juan puni e, third floor khou cinema hall khatni tu jangmei puat nun juan puni e.

Kumma fourth floor khou rui gym le gaming zone su puni e tuna sa e. Glass ruina kasiam lana Tamenglong lun ti gai mbu thaomei kai akhat su nimei mall hei public tuang kai su puni e, mi mall khou hei dukan feet 15-20 dai puni e, mi dukan tei charai akhat ruina tingkum 30 kakaipou- pei suna sinsu nu khang kasiammei gan khou Dengka 15 – 20 lakh tilou rei nina re tuna sa e.

Centenary Mall lung khou official khang dukan 10, dukan 30 rui tender su puni e, Rongmei khang dukan 12, Liangmai le Zeme khang dukan 8/8 khatni Inpui le Kuki khang dukan kaneih- nei ti puni e tuna sa e.

Manipur khou reiliangmei suna government le private kariuna kasiam nimei mall hei kaguaina Dengka 8 crore dou kei puni e tuna sa e.

Kaiphun 140×80 seng-daimei khou kasiam thao nimei mall khou hei dui tank khatni solar power louna mall khou bammei guai khang piu biu khang kasiam puni e tuna sa e.

Centenary Mall tihei District Council ruina sigai jaosin puni e, kumma tender khatni baimei contract lam guai ni asaan mak khou tithai pat puni the tuna sa e.

Centenary Mall tuang committee khou tei Tamenglong ADC Chairman Namsinrei Panmei rui kapi kumma Deputy Commissioner, CEO, Tamenglong SDO, PHED EE kaniu ni member su bam e.

Committee meeting bam kanmei khou tei Chairman Namsinrei Panmei rui jailou kan e, DC Armstrong Pame, Small Town Committee Chairman Charles Liangdiang, CEO/ ADM Kajaigai Gangmei, Tamenglong SDO Mahesh, DRDA EE Dirang Gangmei khatni baimei nun kajao kan e.