‘Pre-Matric Scholarship’ apply sw khang 31st October nganv lanc lou bam e
TAMENGLONG, Oct 2: Ministry of Minority Affairs bangc khou Minority Community khang ‘PreMatric Scholarship’ khatni ‘Post-Matric Scholarship’ hei ntaw-taw apply sw bam geic the.
Mituang Scholarship’ hei Minorities bangc khou bammei nchamnac nunc rui tat kanmei exam khou 50% marks laa tangc kanmei rui apply sw nuh puni the.
Tiki nchamnac pui-pu tuang annual income hei daengka lakh akhat khou rui mbu nuh makge. Pre-Matric Scholarship hei Class I khou rui X khou ku bammei nunc rui apply sw nuh puni. Scholarship hei nchamnac rui admission, tuition khatni hostel fee khou keylou kanmei zu tei tii dat khang e.
Mituang Scholarship hei kaikhunh khat khou alauc gaanvnei (2) nganv apply sw nuh puni. Nchamnac tei school khou attendance regular swna tatkey bammei nina e. Tiki nchamnac tei Central Government rui tiimei Scholarship baihmei khou apply sw lak nina e.
M i t u a n g Scholarship apply sw nimei guay rui kalam tei National Scholarship Portal (NSP) khou zauclou nuh e khatni online application tei w e b s i t e : www.scholarships.gov.in. khou rui swlou nina e.
COVID-19: Tamenglong mei 12, Noney mei 7 mphang dat kan e
GNN, Tml, Oct 2: COVID19 Common Control Room tuang chamv theilayna tat kanmei khuangh 24 lungc khou tei Tamenglong mei COVID-19 naimei 12 khatni Noney mei 7 mphang dat kan e.
Mi tei aseih State khou COVID19 naimei kathanh 286 mphang kanmei pangc khou kazauh kan tuang e. Mi 286 khou tei CAPF 60 kumna baihmei 226 kazauh kan e.
Aseih mphang dat kanmei nunc ta pacna State khou COVID-19 naimei 11397 tangc bam the. CAPF ramh makmei 226 khou tei 2 thu State baih thangc rui guang datmei e tiki baihmei 224 thu State khou na bam bammei Local mei e twna chamv rui saa e.
State baih thangc rui guang datmei 2 tei Imphal East lev Bishnupur khou rui e. Mi 226 pangc khou tei Imphal West mei 73, Imphal West rui 103, Thoubal rui 4, Senapati rui 2, Jiribam rui 2, Bishnupur rui 4, Churachandpur rui 11, Tamenglong rui 12, Noney rui 7 khatni Tengnoupal rui 8 kazauh kan e.
Chamv theilayna COVID-19 khou rui 1 theic dat kan dihe, mitei ntumei katingkwm 64 mei e. Katateic JNIMS khou rui ravzauh bam khou rui maek kan tuang the twna saa e kumna aseih theic dat kanmei ta pacna State khou COVID-19 rui 69 tangc bam the.
Tiki COVID-19 khou rui gay dat bammei 351 ta ni discharge swlou kan e. Mi 351 tateic pacna COVID-19 khou rui 8992 thu gay dat kan the tiki 2336 ta ravzauh bam e. COVID-19 khou rui gay datmei rate hei 78.89% khou tat bam e.
