Tamenglong khou Containment area 26th May nganv tatkey khang kaucpatlou kan the

1 Star2 Stars3 Stars4 Stars5 Stars (No Ratings Yet)
Loading...

Tamenglong khou COVID19 nai bammei ta zaucsinh khang Ward No1 – 5 khou Containment kaucpatlou bammei tei May 26th nganv tatkey dat khang tingmik lou haplou kan the.

Aseih Tamenglong District Magistrate, Armstrong Pame IAS, rui tiipatmei Order theilayna tat kanmei May 12th nungc tei neidak akhat khang kaucpatlou kan tuang e, tiki mi lungc khou COVID19 naimei ta phugutmei ganv khou COVID-19 naimei mphang bam tina mi ravpyan hei naengv lik pat bam nuh dihe twna Health Department rui samei theilayna Containment Order tingmik tihaplou tuang e twna sa e.

Order theilayna, mi bamv khou Containment lou bam sihni kage nai liangmei puat phungc kalw bammei nunc, National & State Project nunc khatni labour nunc tat kalw makna taanv sw bammei nunc ta thingh makge twna sa kan e.

Kage naimei puat nunc Home Delivery sw tat bammei, Medical Institution, Child Protection Service khatni COVID-19 pu kaep khang tat kalw bammei nunc ta thingh makge. Kumna Bank ni khuangh 10:00 AM khou rui 2:30 PM nganv laanc puni e twna sa e.

 

Village/Ward Level Task Force kasiamh khang Order tiipat kan the

Home Department, Government of Manipur rui tiipatmei Order theilayna State khou COVID-19 hei mbuna ranv ku bam khou namv khatni Ward tuang Task Force kasiamh khang sa kan the. Order theilayna mi tuang Task Force khou hei mansei 6- 10 dou kazauh nina e.

Namv khou kailaek 150 tangh makmei nunc rui namv baihmei nunc lev kariuna Joint Task Force hei kasiamh nina e kumna mi tuang Task Force tuang Member khang kadahmei khatni taanv tatkey nimei hei Constituency tuang MLA, mi bamv khou taanv sw bammei CSO/NGO khatni phwam nunc lev pary rahmei tangv District tuang DC rui tiithay pat dat puni e twna sa kan e.

Mi tuang Task Force nunc khang hei Health Deptt rui PPE, Sanitizer, Mask khatni mikumhmei baihmei kage naimei tiilou puni e, kumna kaniw rui tat kalw bam khang Task Force akhat khang tingmik khou Dk 1000 ni tiilou puni e twna sa kan e. Mi nunc hei Relief & Disaster Management Department rui tiipatlou ethei DC daeng khou rui mphang puni the twna ni sa kan e.

Dukan laanhmei tingmik nunc khou COVID Appropriate  Behaviour hei meicguayna rui nthuihna piu nuh khang mi Task Force nunc rui zaucsin puni e. Home isolation/Quarantine/ Micro Containment Zone khou bammei nunc tat kalwmei ta zaucsin puni e khatni COVID-19 naengvmei ta phumei ganv khou kaniw rui Health Department ta taanv sw nduanghlou nina e twna sa kan e. Tiki kage nai changhmei taanv naina tat kalw bammei nunc ta thu thingc nuh makge twna ni sa kan e.