Tamenglongmei 10 COVID-19 neng dat kan the

DihCham News Service

TAMENGLONG, Oct. 6: Tamenglong district khou bammei gaan 10 khou asei hei ni COVID-19 rapuat nimtou dat kan the. Tamenglong khou asei hei gaan 128 ruina mi rapuat phung bam e tuna medical team tuang cham akhat rui sa e.

Aseiluan katuanna Tamenglong khou mi rapuat nimpat bammei lung khou RNBA complex, Farmlane khou naimei Achilo Panmei kai le Chingkhiuluan khou naimei Dingsung Pamei kaita containment zone the tuna Tamenglong Additional District Magistrate Kajaigai Gangmei, MCS ruina latdan tipat kan the.

Naga Women Peace Delegation ruina India le Naga official nun ta ariuna pari rakan the

Dimapur, Oct. 6: Naga Women Peace Delegation tuna kaomei phuam tuang meipui nun rui Delhi khatni Dimapur khou bammei India khatni Nagamei leader nun ta ariu lana pari ra gei kan the.

Global Naga Forum (GNF) tuna kaomei Nagamei kabam bai baithang bammei guai ruina kasiamloumei phuam ruina ni Naga peace talk lam khou Government of India ta ariu lana pari ralou kan e tuna sa e.

Naga Mothers’ Association (NMA) ruina ni NSCN-IM le NNPGs ta Dimapur khou ariuna pari ralou kan e.

Talk hei luai jaina solution phung guang jaimei ta meipui guai ruina ni kahao bam e tuna meipui guaina khin suna NMA tei rui salou kan e.

Nagamei meipui guai ruina solution guang jaimei ta kahaona nkhuan bam the tumei tithailou o tuna Naga Women Peace Delegation ruina Th Muivah khang che hiku kan e.

Nagamei meipui guai state bai baina lung bam sini inclusive sumei solution ta toho phenga jao bam e tuna sakan e.

Meipui nun ruina Indiamei ta ariumei gankhou tei National Security Advisor (NSA) Ajit Doval, Deputy NSA Padsalgikar kanei ta ni ariuna pari ralou kan e tuna sa e.

Meipui nun tei ruina Prime Minister khang himei memorandum akhat ni Ajit Doval khou tihaanlou kan e tuna sa e. Nagaland, Assam, Manipur, Arunachal khatni Myanmar khou lung bammei Nagamei guai tihei ti baklou ngam bam the.

Naga tuang identity Flag tihei chakhuang suna lalou nina de tuna sakan e. India le Nagamei kak khou ning laan bammei lam nun minna kaphian kan e. Nagamei khatni Indiamei guai ruina jei kei nthek lana jaimei settlement phung guang khang suni na the tuna salou kan e.

Nagamei ram khou AFSPA loumei hei ruina meipui guai khang puatrit akhat suna bam e tuna ni salou kan e.