Tamenglong khou puatc manv kathanh tiipat kan the

S u b – D i v i s i o n a l Magistrate, Tamenglong, Mahesh Chaudhari, rui tiipatmei Order theilayna Tamenglong khou tuzangmei puatchei manv kathanh kasiamhlou kan the. Mi tei Tamenglong S u b – D i v i s i o n a l Magistrate, Traders Association khatni Dukan kaipouc nunc lev Meeting tatkeyna kasiamhlou kan tuang e, mi tei Essential Commodities Act 1955 tuang Section 3 (Sub Section 2C) lev Section 3A bangc khou kasiamhlou kan tuang e.

Tiipat kanmei Order tei manv Alu Dk 30/ kg, Tilou (Onion) Dk 40/ kg, gannam (Garlic) Dk 160/kg, Matar Dal Dk 80/ kg, nruaihduih (Egg) Dk 200/plate, Matar Dk 80/ kg, Atta Dk 35/kg, Maida Dk 40/kg, chini (Sugar) Dk 50/kg, Masur Dal Dk 100 (M) Dk 110 (S), Parimal napsaem Dk 2200 (50/kg), Ntai nap Dk 2500 (50/kg) laa puni the kumna Thauh (Oil), Ntey (Salt) lev Suji khatni baihmei puat guay thu MRP khou naimei tei kumc bam puni e twna sa e.

Mi manv nunc hei kalaih khang kage nai ethei kaganv guang pw khou kalaic dat puni e twna ni sa kan e. Kumna thow kumhmei rui mi Order twanlyammei nai ethei karuh khou Essential Commodities Act 1955 tuang Section 6A lev Section 7 theilayna taanv tatkey puni e twna order khou tei hy kan e.

 

AADHAR Card link swlou makmei Ration

Card nunc zanc laganclou kan the: DC

Ration Card khou AADHAAR Card link swlou makmei nunc zanc laganclou kan the kumna bw pum napsaem mphang nimei tei kaniw mphang ni tuang ramh makkhe twna DC Tamenglong, Armstrong Pame IAS, rui tiipatmei chamv rui sa e.

Kum sihni ntaw-ntaw ni AADHAAR Link swmei taanv hei tatkey bam e kumna link swlou makmei nunc tei rui Ration Card khou AADHAAR Link swlou datna kaniw zanh lathaulou dat nuh e twna sa e.

Kumna thow kumhmei Ration Card mphang rey kanmei nunc tei AADHAAR Link swlou sihni napsaem mphang mak ethei kaniw tuang AADHAAR Card lev Ration Card tuang Xerox Copy tei katuang-katuang FPS Agent khou tiilou nuh e.

Mi tei SDO rui zauc tang ethei kaniw rui napsaem mphang nimei zi mphang nuh khang kasiamhlou dat puni e twna sa e. Mi kumhmei beneficiary nunc tei rui May 10th mav khou FPS Agent nunc khou tiilou khang ni sa kan e.

Chamv theilayna NFSA khatni PMGKAY-III tuang napsaem tiipatmei ni khou ntaw naimei Policy theilayna tatkey puni e twna ni sa e.

You may also like...