Tamenglong, Mar. 16: Kandih baithang mei nun tho buh ku khang rammethei planet baithang lung tat khang dimduan bammei lung khou Tamenglong district khang akhatnamei District Hospital khou hei doctor, nurse khatni baimei taan taanhmei mekmei jeng ruina mi hospital hei mbang kei numei thek khou bam the tuna staff akhat ruina sakan e.

Duigailong nam khou naimei District Hospital khou hei nurse khatni doctor kasing ntang makmei jeng rui patient nun ta jao chuina jao ngam mak nga bam e, nurse nun kadai suna rianra lakmei ta thai mak nga taan thiak aju taanhna lak bam the tuna ni medical superintendent in-charge ruina sakan e.

Tamenglong pusang khang hei full-fledged Medical Superintendent, matron, nursing sister incharge, female health assistant, pharmacist (Ayush), X-Ray technician, steward, Chowkidar, driver, peon, dhobi khatni baimei nai kaji rapmei post nun nganna mekge tuna ni sakan e.

Nurse 45 nai nina re tuna saloumei lung khou aseidou hei 17 nai e, male le female ward attendant 25 nai nimei khou chaneina nai e hospital heidi daimei khou sweeper akhatna de, kaling tho sweeper chanei ni tuange tuna sa e.

Public nun ruina thailou mak ethei nu makmei jeng ruina program khatni awareness mung aju lengmei gan khou mansei kage nai rap rap the tiki program tho kasing mbu ku bam e.

Civil phuam nun ruina doctor ti guanglou mak ethei nu makge tuna demand sulou tina doctor asek kajan khanga order patlou puni e, kum sini taanbam khou guang mak khou ruina stay order la dat ngam kan de tuna ni sakan e.

Hospital khou taan taanhmei kasing raona rianra bammei lung khou mi pusang khang hei dui mekmei rui rianramei ti haplou bam e tuna ni sakan e.

Coronavirus rapian gan khou nganna blood bank mekmei meiki rapuat ta jao khang dialysis sumei tuang mekmei ruina mansei geih ngan kapanti tatkanmei ni nai the tuna doctor akhat rui sakan e.

Kapum nritmei meipui nun khang Pradhan Mantri Mantru Vandana Yojana (PMMVY) scheme hei nai e, mi scheme la nimei guai ruina Angangwadi centre nun khou form lana sian Dk. 5,000 ngan la nu e tuna ni sakan e.

CAF& PD khou taan la puni

Tamenglong, Mar. 16: Government of Manipur bang khou naimei Consumer Affairs, Food and Public Distribution department ruina taan bam 13 la khang kaohpat kan the.

Guangnimei March 22 khou ruina form tipat kahou lana mi buh lung khou form submit su dat gei khang tithai pat kan e.

CAF& PD tuang taan bam nun kiu thu- Auditor gaan kanei, LDC 46, Store handler chanei, Counsellor akhat, Steno akhat, Quality Inspector 25, Peon cum Chowkidar 31, Driver 18, Sweeper akhat, Peon 19, Chowkidar chanei khatni Picker akhat la puni e tuna sapat kan e.