Aliunah maigu result wiraleng private tuition pi tadkhai ramah?
Thaidou ariak nahmai tasii-ningting phiubo hai tasiiky (school) gasu kati khaibo ronnah makjiu mali lam (private tuition and coaching classes) ga tadlu jiu kati sanbo hai nkiu khang mide. Private tuition tadbo chamai riak hai karaidou songdi tuhoi Manipur ga tingkum saisui nkiu khang jiu bamme tiuye, siniu aliu nahmaitu private tuition maksai coaching classes gasu tasii-ningting pawat kawibo doulubui mah?
Nagaland gasu thaikum 2022 matric exam ga kuthu lubo aliumainah Delphi Oinam kubopui parah private tuition maksai coaching classes lukmak ye tiuye khatdi result kawi (topper) wangra maksai karin rong ga joura jengmana malilam katisan bo pageng bam son makye tiu dinne. School kiga babumai niu katikhai bonai kikhunmai cham makjaibo suide paleng rah tiuye (the lecture given by my school teachers and the guidance from my parents is sufficient for me). Khatdi Nagaland gasu UPSC exam thaikum doulubo pui Miss. Imsennaro Walling, ranked 585 interview ga haitiujiu dinne, private tuition raithubo tingkumg ga tadle tiudi prelim gadi padlu makjiu failed thiu migasu paronna self-study kammine, thaikum hai malot pasumbo (3) exam me tiuye.
Manipur ga private tuition tad makengbo lam
Annual Status of Education Report (ASER) 2021 report saisui Manipur ariak nahmai private tuition tadbo hai 49.1 per cent bamme (India ga average 40%) tiu ye. Aliu kadih ga private tuition tuhoi maning chakung thiudiangbo khatdi haisi palunhou thiujiu tadwang kinne aliunah maigu result wira kamaning gasu. Aliu pui-piu mai niu maningbo ra private tuition tadmak sai result kawi doulak mine tiu maning ja lung kawimai, lung kasamai mathiusi aliugu kabam, kaha phung padjiu aliu nahmai tu private tuition maksai coaching classes ga langkhai jiu lung bamme. Majiye, aliu maihina aliunah maigu result wini kam boye, tiudi private tuition turoi na aliu maning chakung mi tukhe.
Education – Exam-oriented
Aliu kakeng khaniura private tuition tadbo ga result kawidou mine siga aliunah mai ariak kamsi ye tiujiu maning ye. Tiudi haibo private tuition dunghai ra exam leng kharoi na taliubo ye siniu aliu nahmai gu tasii hai pawat (quality) kabam bo doulu lak ye tiujiu Chinglen Maisnam, associate professor of Manipur University niu dinne.
Roukhai bolam din masan khaibo
Pariga roukiu mibo hai IPF ga khaibambo kasia aliu Liangmai lad gasu kinni maileng kasia chali padkhai boye. News ga khaibambo kumgap ja pakhiang se chali padlan lu makye siniu kinkiubo ga maning kamou bodi bamlu bui ye tiu dinkhai.
Aliu Liangmai nahdung di pawan wan wangsai topper rong ga wangjiu bamme thaikum di aliumainah khangnia class-XII science ga rank 4th khatdi 5th douluye nkiuja Cherakung di class-X ga rank-1 (one) 1998 ga douye, kaki kimaidi bamme. Aliu Liangmai di tuhoira officer keng khang mide, student maidi kawi-wibo pad karinjiu bammide tiudi aliu chamai kakeng khara namlam (village) ga lungluja chariu suijiu aliunah maitu sanglam ariak kati raleng langkhai jiu bamme. Aliunah maitu wini nkiu jumi jiu aliu ringting kam chariuju miradi kengkha bam boye, di aliu nahmaitu taliu lura npui kengjiu bamdi rangkang tasin-chalan keng jiu thin machum mibo di bamphui ye. Siniu maihina aliuniu kabui-bui bo ga phuilu jiu nahmai tu taliu mawijiu taliu khe khatdi tasii phiu bowan private tuition langmak sai doulu lakye tiujiu manang nju mitu khe. Kenkhai mai mathiu tu thonne.
