Old Alignment khou Tml-Halflong chaeng kasiamhlou khang TVSF rui CM khou Memorandum tii ku kan the

Gaanphiu News Network

Tamenglong, Dec 18: Tamenglong-Haflong National Highway kasiamh nimei tuang Allignment taheic rey khou laalou reymei Allignment khou rui tii kasiamh kalaiclou mak khang Tamenglong Village Students’ Federation (TVSF) rui Chief Minister, N. Biren khang Memorandum tiiku kan the.

Mi tuang Memorandum khou tei Tamenglong-Halflong chaeng hei kage naimei zaeng mansei nunc rui kahouhlouna mi chaeng taheic Tamenglong Village khatni namv kaining bammei nunc rui rigwn bammei chaeng the, kumna mi chaeng luai patmei ta meicguayna rui kahaw bam e twna saa kan e.

Tiki laalou reymei Allignment khou ramh makna kadyngna khou District Administration rui alignment baihmei – chaeng ni saengc, Gradient ni gay makmei, laa dat kanmei thiak hei Tamenglong ta khat sihni ramh khang chaklou makmei thiakge, mi kumhmei thiak hei District Administration rui Tamenglong namvta zuanctuloumei tuang e kumna mi taheic khat sihni kuaklou ngam ni tuang ramh makge twna Memo tei rui saa kan e.

Mi lam khou kazi naimei Authority nunc khou ni saa ku kan the, bw tanghmei phauh sihni taanc kazimei taanclou makkhe, mi thiak hei thu Elected Representative maek khe twna Tamenglong namv ta District Administration rui thouh swlou makmei thiakge.

District Administration tingkwm 100 tanghmei mung tatkey kan the tiki Development lwan khou Tamenglong hei mpeyna nsuan bam e kumna ntaw alignment kalaic bammei hei rui ni nchuzaenghmei kahaw bammei khatni mi project ta machuang hak bammei Tamenglong mei nunc lungning mpeyna tii kabiulou e twna Memo tei rui saa kan e.

Allignment karaan kasiamh guang khou tei ramvdui sw kasihlou kan e kum sihni District Administration ta machuanglouna tatkey kan e tiki ntaw kadyngna khou alignment kalaic dat bammei kiu tabui zaeng rui cho twna thanvna charay rui chwnmei khouna tat khang sw khou rui tingkwm 10 mbu nkhwan guangmei chaeng taheic sw kabiulou bam the.

Thow rui District Administration ta zay mbianghlou tina cho twna ni thanv kan e. Kumna mi lam khou zaucgutlouna mi chaeng hei mansei nunc rui kahawmei theilayna Old Allignment khou Tamenglong-Halflong chaeng hei kasiamhlou khang Tamenglong Village Students’ Federation (TVSF) rui Manipur CM khou zaenghuay kan e.

Chiuluan Baptist Church Platinum Jubilee nganvlou kan the

Gaanphiu News Network
Tamenglong, Dec 18: Chiuluan Baptist Church rui laengvmei Platinum Jubilee aseih rui nganvlou kan the. Aseih Jubilee tuang kaneimei tingmik khatni nganvloumei tingmik swna tatkey kan khou tei Latoungam Rongmei, Freelance Bible Translation Consultant for Bibles International rui Speaker swlou kan e khatni Pouri Gangmei, Associate Pastor rui zaylou kan e.

Mi mung tatkey kan khou tei Keiramsinang Gangmei, Chairman Chiuluan Village rui namvnac nunc kabamv baicna lungc bammei lam rac patna mi namv rui lungc guangmei pary kasaek raclou kan e. Kumna amaypui khatni nkhu-runa nunc ta nkhavlou khang Offering laalou kan e. Mi tei Ariu Gangmei, Asst. Pastor TCC rui katgutloumei ravsuai laalou kan e.

Speaker tei rui mansei akhat rui lwmloumei khatni puancthanhmei akhat swna mbaanv panty nganvlou pw khou panty akhat lungc guang nimei lam raclou kan e. Khatni Christian akhat swmei panty hei kalam akhat kathouh akhat naina lungc bam tuang e twmei lam mincna raclouna Ravguangh khang rui tiipat changh khang kage naimei ndauhlou kan e.

Kamung tatkey kan khou tei mi mung kazauh bammei nunc rui Jubilee tuang latdyng ni laalouna mi latdyng nunc hei nthuihna piu gut khang kalumloumei taanv ni tatkey kan e. Kamung mbanghloumei taanv tatkey kan khou tei Solomon Gangmei, Chairman, Platinum Jubilee Celebration Committee rui Minister swna chuanghphey zay key datmei taanv tei taanclou kan e.

Mi tuang taanvdwan tei Gangkhui Gangmei, Associate Pastor, rui zaylou kan e. Tingmik kanei tatkey kanmei mung khou tei Ariu Gangmei, Asst. Pastor Town Centre Church, rui zaymei bangc khou Jubilee Choir rui zaylou kan e.