NSCN (IM) le Indiamei political leader nun formal suna pari rajai puni the

DihCham News Service

TAMENGLONG, Sept. 17: India le Nagamei kak khou political dialogue tatkei bammei hei nkhammei thek khou bam the, asaan makmei lung khou NSCN(IM) meikhin nun le India tuang political leader nun le formal suna meitin bamma latding la khang karamh puni the tuna lumgai bam the.

Formal meitin hei tatkei makmei hu khou informal suna talk hei tingmikpum kumma tatkei bam tuang the tuna sa e.

Talk hei nthuk gutmei jeng rui NSCN(IM) tuang daimei geih thang ntao Delhi khou gut bam the. Reimei khou GPRN tuang Ato Kilonser (Prime Minister) khatni NSCN (IM) tuang General Secretary suna bammei Thuingaleng Muivah khatni katuang team gutbam rei tuang the.

Katang khou, asaan makmei ma khou tei GPRN tuang Yaruiwo khatni NSCN(IM) tuang Chairman Q. Tuccu khatni Vice Chairman kaniu tuang team hei gut dat kan e. Kum tina, ntao hei NSCN(IM) tuang top leader gaan nchui dou Delhi khou gut bam the tuna sa e.

Talk khou Nagamei khin nun ruina kajao tat bammei hei region tuang khin suna tat rap mak ge tiki ntao hei thu Zeilad region biak thang rui thu kajao tat bammei mek khe.

Thaorei khou Collective Leadership Member RK. Ringthim kajao tat bam tuang e tiki kapum gaichang makmei jeng rui aseiluan hei tat mak nga bam bam the tuna sa e.

GoI meikhin suna Nagamei ta pari ra khang langlou kanmei RN Ravi tihei NSNC(IM) ruina ningchui mak khatni kalat ladat ni makmei thiak pat kanmei jeng rui kamei thu informal talk nun khou hei kajao dat mak nga Intelligence Bureau tuang Director kajaona pari hei rakei bam dat tuang the.



 

Midak khou hei, Eastern Nagaland People’s Organization (ENPO) tuang kapi nunta India tuang National Security Advisor Ajit Doval ruina pari ra khang kao kan the. Mihei ni daimei duan akhat re tuna chak bam e.

Kalam thu, India tuang nthukmei latding lamei khou, lat khangkiuJammu and Kashmir khou Constitution tuang Article 370 laganhmei latding lamei kummei khou hei Ajit Doval pi kajao e tuna sa bam tuang e. Khatni, Naga kaguaina khang suna NSCN(IM) ruina pari tatkei bammei lung khou hei ENPO ruina Nagaland tuang neipat biak khou naimei district nun ta lou kariuna baimei state kasiamlou o tuna ntaan bam tuang e.

Latbam asek ta lum kho tu ethei, aseikum September bu lung khou Indo- Naga political latbam hei luailou nina the tuna Prime Minister Narendra Modi ruina pari ra bammei nun khou tithai guang kanmei nai the tuna sa e.

Tiki, Naga biak thang rui thu, mi latbam hei kagan lamei latbam ramme tiki nthei thang latlu nai dat mak khang kathiak nchumma kaphianloumei hei rui nthukmei de tuna sa kan e.

Midak khou hei, NNPG ruina ni GoI le kaniu kak khou nunalou kanmei Agreed Position theilaina lat luai kei khang kaniu thu chamdaan the tuna sana mi latbam hei luai nian ethei gaimei khang suang simei rui mbu ku puni the tuna pingdiumei ni ndao kan tuang the.



You may also like...