March 11 mav khou ADC Election Notice tiipat mak ethei Total Shutdown tatkey puni: ATSUM

TAMENGLONG, Mar 5: March 11, 2021 mav khou ADC Election tatkey nimei tingmik tiipat mak ethei 12 March nungc zipchwng khou rui kahouhna 24 hours total shutdown tatkey puni the twna All Tribal Students’ Association (ATSUM) rui saapat kan the.

Mi tei 2020-22 tuang rey liangmei swna ATSUM tuang General Assembly, Indoor Stadium, Bakshi Ground, Hungpung, Ukhrul khou tatkey kan khou dinglou kan tuang e.

ATSUM president Seiboi Haokip theilayna Total Shutdown loumei tangv sihni ATSUM rui ney bammei taanclou mak ethei Indefinite Blockade tatkey puni e twna saana mi lam khou Manipur Government rui lungsuhna zaucgutlou khang ni zaenghuay kan e.

ADC Election hei kaganv chana tatkey khang saa guangmei bw 3-4 the, kalam cha mak hakna HAC rui ADC tuang Term zay kasuanhlou kan e, mi tangv October – November 2020 khou Election tatkey dat khang tw tuang e tiki ntaw nganv Election tatkey mak bam e.

Kumna April 2020 khou ADC Election tatkey khang ATSUM rui nuhlou kan tuang e, tiki ntaw nganv Election tatkey nimei Notice tiipat mak bam e.

Notice tii patmei ta nchuzaenghna khwan bam khang zaenghuay guangmei theilayna khatni February 24, 2021 nungc ADC election notice tiipat puni the twna saamei theilayna khwan bam tuang e twna ni saa kan e.

Manipur Education Dept rui Academic Calendar CBSE theilayna tat khang sw bammei hei ni nuh makge, mi taheic khatni sihni nuh ni tuang ramh makge twna ATSUM tei rui saa kan e.

Kumna Meetei/Meitei rui ST khou kazauh khang ney bammei taheic ni khat sihni nuh ni tuang ramh makge twna General Assembly khou tei kaluaihna dinglou kan e.

Delimitation tatkey khang sw bammei lwan khou tei Delimitation hei katumcna tatkey khang ATSUM rui zaenghuayna mi CSO nunc rui ni ATSUM ta machuanglou khang zaenghuay kan e.