Loktak Hydro Power Project kasiam thao khang MoU sign sukan the

DihCham News Service

TAMENGLONG, Sept. 3: Noney district khou naimei Luangjang (Thangal) le Taosang Khunou nam khou Loktak Downstream Hydro Electric Power Project kasiam thao khang Government of Manipur le National Hydro Electric Power Corporation Ltd (NHPC) ruina 31 August 2020 nung tei Memorandum of Understanding (MoU) sign sukan the.

MoU sign sukanmei tatei Loktak Downstream Affected People’s Welfare Association ruina neilamei ndao kan the. Mi project kasiam thao ethei mai 90 Mega Watt (MW) tipat khang tuna 2004 kum dinglou kan tuange tiki public interest khou rui ti nthiam mai kei datna 66 MW na khang kasiam dat puni the tuna sa e.

Sa bammei project hei Luangjang nam khatni Leimatek Apin khou rui kasiam thao khang e tuna sa e. Sa bammei dam lam khou hei compensation ti pat khang ni kaluan padei khou salou kan tuang the tiki lat nthan jat ti mak nga kham bam tuang the tuna sa e.

Mekkanmei Prof Gangmumei ruina University khou bammei dou ruina DPR salou kan tuang e tiki taan suna taanh patlou maknga bammei lung khou Chief Minister N Biren Singh rui jaimei BJP government ruina aseiluan taan sinthao dat khang su bammei tihei neilamei ndao kan e.

You may also like...