‘Land of Oranges’ Tamenglong hei kazi naimei nunc rui zauc gutlou o

Tamenglong district tihei ‘Land of Oranges’ twna thayna bam e tiki kazi naimei department hamh ethei state government rui zauc gut chuy lou makmei ethei komla bang hei theic ngam bam nuh e.

Komla bang theic key bammei lam, ‘Role of Media’ khatni water conservation lam khou ‘The Gaanphiu Mail’ editor khatni Tamenglong Times editor Jimmy Pamei lev twna Mandeu Phunguang, Tousem subdivision khou ZBA rui laengvna namvmei kadaih swna komla lau taanhmei nunc ta pary rac lou kan e.

Mandeu namv tuang Chairman Hangrangbe Newme, Vice Chairman Ramngeilak Kuame kazauhna komla lau taanhmei gaanv 20 mbu ta pary rahmei ganv khou namvmei kailaek 120 lungh chamna komla lau hei taanc bam tuang e.

Kumna tingkwm geic sih hei komla lau khou rui namvmei tuang income gay hakna bam tuang e. Season akhat khou namvmei guay rui 407 truck trips 28 mbu hei kapaeng phungc zuanc tatlou tangc kan e twna sa kan e.

Tiki kwm 2007 tangv tei rui komla hei karik gutna theic key kahouh kan e. Mituang lam khou kazi naimei department nunc khou salou kan e tiki gaanv khatna sihni kailuang guang tangcna zauclou mak kan e twna pian makmei ndauh kan e.

Komla tei kamaan (root) khou rui si kahouh e. Kumna kathai nthai geic bam sihni nthyamna, khiangc e kumna kanuy nic nthyam keyna samh (fungus) tow kahouh kan e, mitangv kanni thei komla bang tei theic rap rap the twna komla lau ruaihmei nunc tei rui sa kan e.

Kailaek kathui komla lau nai bammei tei ntaw thu kailaek 10 mbuna dithe, komla bang 80% mbu thu theic kan the. Ngangv loumei bam maekmei namvmei nunc tei ntaw thu komla farm taanc dat nimei chwn pat taan the twna sa kan e.

Komla lau khang kakhanna khouringh geihmei nruaih makna guang kan tuang e twna nic sa kan e. Komla tuang kapyan hei Tousem subdivision tuang namv geihmei khou nic pat muay kan e twna sa kan e.

You may also like...