Health Staff kazauhna Tml Local 17 khou rui COVID-19 mphang kan the

TAMENGLONG, Sept 27: Tamenglong khou Local Transmission geicna pat bam khou hei Neihneic nungc tei ni Tamenglong Local 16 khou rui COVID19 nai the twna mphang dat kan dihe.

Mi 16 hei Health Worker tuang kaikhunh khou rui mphang kan tuang e mi khou tei bw 2 namei ngana ni kazauh kan e. Health Worker kai bamv tateic ntaw Containment Zone khang kaucpat punina bam the.

Mi tangv tei baihmei Health Staff khou ni COVID-19 nai the twna mphang dat kan e. Tml District Hospital khou taanv sw bammei Staff khou rui COVID-19 mphang kanmei tangv tei Hospital OPD, IPD khatni immunization Cell ta khuangh 48 khang Containment kaucpatlou kan the.

CMO Tml, Dr Chambo Gonmei, rui tiipatmei chamv theilayna Emergency, Casualty khatni Flu Clinic thu laanc bam puni e tiki cha mak langvna pucshang guangmei ganv khou mpeyna suriak thaylou khang kabeylou kan e.

Aseih District Head Quarter khou na COVID19 naimei 17 mphang dat kanmei ta pacna COVID19 naimei 392 tangc bam the. Mi pangc khou tei 336 thu gay dat kan the tiki ntaw 56 ta ravzauh bam e twna chamv rui saa e.

Noney khou Total Lockdown kauc patlou kan the

Noney, Sept 27: Local Transmission hei kabamv guayna khou kumcna geicna pat khou Noney khou ni pat bam the. Noney khou swna kalaanv tei rui Total Lockdown kahouh kan the, mi tei Longmai Bazaar Board rui lou kan tuang e.

COVID-19 naimei nunc khou rui naengvlou bam nuhmei nunc ta phumei taanv hei luai maksaanv mi tuang Total Lockdown tei lou bam puni e twna chamv rui saa e. Mi tei Manipur Rural Bank staffs, Noney Branch lev Manipur Development Financial Investment, Noney branch tuang Staff khou COVID-19 mphang kanmei tangv lou kan tuang e.

Mi tei Babina Testing Centre, Imphal khou Test swmei ganv khou mphang kan tuang e. Kumna 22nd Sept khou rui 25th Sept lungc khou M.R.B., Noney branch khou gutloumei nunc ta Tengkonjang Higher Secondary School Testing Centre,Noney khou guang COVID-19 Test sw khang Chief Medical Officer, Noney Dr. Edwin Golmei rui tiithay pat kan e. Test sw khang guangmei ganv khou SOP nthuihna piulou khang ni zaenghuay kan e