District Hospital Tamenglong khou Child Specialist maek tina kunghmei ariw bam the

TAMENGLONG, Oct 21: Tamenglong District Hospital khou Child Specialist lev Medicine Specialist maek tiimei zaeng rui COVID-19 naimei katingkwm 8 namei alauc akhat ta Imphal (JNIMS) thangc referred swlou kan the.

Mi ntumei alauc hei COVID-19 na ramh makna aphi ni rw tina kungc sih bam tuang e tiki Tamenglong khou ravzauh ngam tii makmei zaeng rui Imphal thangc ravzauh khang thouclou kan tuang e.

Mi khou tei JNIMS khou lou khang CMO Tamenglong rui tiithaylou ndaanvna key kan tuang e tiki ntumei alaucna tei lev kapu rui Imphal key tanghmei ganv khou JNIMS khou laeng maek khe twna kaney ta tii gut mak kan the.

Ntumei alaucna tei nnau ranv tiimei zaeng rui Oxygen tii bam tuang the tiki kaney tateic JNIMS authority rui tiigut tiimakmei zaeng kapaengh khou khuangh 3 dou nkhwanlou kan e.

Mi khou District Task Force khatni lungsuhmei nunc rui kapy kagav swmei nunc ta kachuh datmei tangv zingbangc khuangh 10:00 PM zaengc khou rui kaney ta tiigut datna zip nuhmei bamv tiilou dat kan e.

Tiki laengv maek timei zaeng rui kandih khou zip khang kabamv tiilou dat kan e. Mi ntumei alauc lev kapu khou tei COVID-19 nai the twmei mphangmei tangv Tamenglong khou ravzauh bam rey tuang e. Tat kanmei ganv khou ni mi kumhmei thiak, pucshang khou tiigut mak mei thiak hei pat kan e.

Zaeng 4 lungc khou ADC Election Notice tiipat khang ATSUM rui saa kan the

NNN, Imphal, Oct 21: Zaeng padeih lungc khou Autonomous District Council (ADC) tuang Election Schedule hei State Government rui tii pat khang All Tribal Students’ Union, Manipur (ATSUM) rui saapat kan the.

Tiiloumei tingmik lungc khou Election tatkey nimei lam khou tiithay pat mak ethei tanhmei taanv tatkey puni twna nchamnac phwam tei rui kapyn kan e.

Aseih Chingmeirong khou naimei ATSUM Office khou Press Conference tatkey kan khou tei tiiloumei tingmik padeih lungc khou State rui ADC Election tatkey nimei tiithay pat mak ethei reymei swna 48 hour Interstate Movement Bandh tatkey puni e, kumna chyng khou taanv sw bammei National Project nunc ta ni thingclou puni e twna ATSUM President, Seiboi Haokip rui saa kan e.

Kum sihni State Government rui taanclou makge tw ethei State khou Indefinite Bandh lou puni e, kumna chyng khou bammei mansei nunc lev phwam baihmei nunc kariuna indefinite interstate bandh nganv tatkey puni e twna saa kan e.

October/November 2020 khou ADC Election tatkey puni e tw tuang nai ethei ntaw Election Notice tiitpat bam nuh tuang dihe twna ATSUM President tei rui saa kan e.

Ningto wlou nuh e, ntaw taanv sw bammei ADC tuang term hei aseihkwm May khou tei rui nganvlou kan tuang the tiki ting simei lev kalam baihmei kasaek khang nkhamlouna Tenure tateic bw 6 lou haplou kan tuang e.

You may also like...